ຫ້ອງການກອງເລຂາກອງທຶນ ພັດທະນາໂທລະຄົມມະນາຄົມ ແລະ ການຫັນເປັນດີຈິຕອນ, ກະຊວງ ເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ພະແນກເຕັກໂນໂລຊີ ແລະ ການສື່ສານ (ພຕສ) 05 ແຂວງພາກເໜືອ (ແຂວງຜົ້ງສາລີ, ແຂວງຫຼວງພະບາງ, ແຂວງອຸດົມໄຊ, ແຂວງບໍ່ແກ້ວ ແລະ ແຂວງໄຊຍະບູລີ) ໄດ້ຈັດພິທິ ເຜີຍແຜ່ດຳລັດ ວ່າດ້ວຍ ກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ ຂື້ນໃນລະຫວ່າງວັນທີ
01-13 ກໍລະກົດ 2026 ຜ່ານມານີ້, ຢູ່ຫ້ອງປະຊຸມຫ້ອງວ່າການແຂວງຂອງແຕ່ລະແຂວງ. ໂດຍມີຫົວໜ້າ-ຮອງຫົວໜ້າພະແນກ, ບັນດາຂະແໜງການອ້ອມຂ້າງພາຍໃນແຂວງ, ບັນດາທ່ານຄະນະຫ້ອງການ ຕສ ເມືອງ ແລະ ຕາງໜ້າຈາກຫ້ອງການກອງເລຂາ ກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ, ພ້ອມດ້ວຍແຂກທີ່ຖືກເຊີນເຂົ້າຮ່ວມ.

          ຈຸດປະສົງ ກໍເພື່ອລິເລີ່ມການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງສູນກາງພັກ ຄັ້ງທີ XII, ກໍຄືມະຕິກອງປະຊຸມໃຫ່ຍ ຂອງອົງຄະນະພັກແຂວງໄຊຍະບູລີ ຄັ້ງທີ VIII, ແຜນພັດທະນາເຕັກໂນຊີ ແລະ ການສື່ສານ 05 ປີ ຄັ້ງທີ IV (2026-2030) ກ່ຽວກັບການຈັດຕັ້ງຜັນຂະຫຍາຍວຽກງານການຫັນເປັນ 3 ເສົາຄໍ້າດິຈິຕອນ (ລັດດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ) ຢູ່ພາຍໃນ ສປປ ລາວ. ເຊີ່ງດໍາລັດ ສະບັບເລກທີ 278/ລບ ສະບັບນີ້ ແມ່ນນິຕິກຳໜື່ງທີ່ມີຄວາມສໍາຄັນທີ່ສຸດ, ທີ່ຈະຊ່ວຍພັກດັນສະໜັບສະໜູນເຮັດໃຫ້ການຫັນເປັນ 3 ເສົາຄ້ຳດິຈິຕອນ ປະສົບຜົນສຳເລັດຕາມແຜນທີ່ພັກ-ລັດຖະບານ ໄດ້ວາງໄວ້ໃນດຳລັດສະບັບນີ້ ເພື່ອກຳນົດຫຼັກການ ແລະ ລະບຽບການ ກ່ຽວກັບການຄຸ້ມຄອງ, ນໍາໃຊ້ ແລະ ຕິດຕາມ, ກວດກາ ກອງທຶນພັດທະນາໂທລະຄົມມະນາຄົມ ແລະ ແນໃສ່ ສະໜອງທຶນໃຫ້ແກ່ການພັດທະນາຄົມມະນາຄົມ ແລະ ການຫັນເປັນດິຈິຕອນ ເພື່ອລະດົມ ແລະ ສະສົມທຶນໃຫ້ມີທຶນພຽງພໍການຫັນເປັນດິຈິຕອນ ຢ່າງຍືນຍົງ, ໂປ່ງໃສ ແລະ ສາມາດກວດສອບ ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ຕາມທິດຫັນເປັນທັນສະໄໝຂອງ ສປປ ລາວ. ກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ ແມ່ນກອງທຶນຂອງລັດທີ່ສ້າງຕັ້ງຂື້ນເພື່ອສະສົມ ແລະ ລະດົມທຶນ ຈາກພາຍໃນ ແລະ ຕ່າງປະເທດ ນໍາໃຊ້ເຂົ້າໃນການຫັນເປັນດິຈິຕອນ, ການຂະຫຍາຍ ແລະ ພັດທະນາໂຄ່ງລ່າງພື້ນຖານໂທລະຄົມມະນາຄົມໄປເຖິງຊົນນະບົດເຂດຫ່າງໄກສອກຫຼີກ, ການພັດທະນາຊັບພະຍາກອນມະນຸດ, ຖານດິຈິຕອນ ຄວາມປອດໄພຂອງການນໍາໃຊ້ເຕັກໂນໂລຊີ, ດິຈິຕອນ ອອກໄປສູ່ບັນດາເມືອງ ແລະ ຕາແສງ ໄດ້ຮັບການພັດທະນາຢາງບໍ່ຢຸດຢັ້ງ.