ເພື່ອສ້າງກົນໄກປະສານງານ, ແລກປ່ຽນຂໍ້ມູນຂ່າວສານ  ແລະ ການຫັນເປັນດິຈິຕອນ ເພື່ອໃຫ້ສາມາດເຊື່ອມໂຍງຂໍ້ມູນຕ່າງໆ ພາຍໃນສູນກາງສະຫະພັນກຳມະບານລາວ ກໍຄືຂັ້ນສູນກາງລົງຮອດທ້ອງຖິ່ນໃນຂອບເຂດທົ່ວປະເທດ ເພື່ອເຮັດໃຫ້ສະມາຊິກກຳມະບານ ກໍຄື ກຳມະກອນຜູ້ອອກແຮງງານ ກາຍເປັນຜູ້ທີ່ມີຄວາມຮູ້ຄວາມສາມາດທາງດ້ານດິຈິຕອນ, ລຶບລ້າງການກືກດິຈິຕອນ ໃຫ້ກາຍເປັນກຳມະບານດິຈິຕອນ. ດັ່ງນັ້ນ, ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ສູນກາງສະຫະພັນກຳມະບານລາວ ຈຶ່ງໄດ້ຮ່ວມມືກັນ ລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍ ການຮ່ວມມືໃນການຫັນວຽກງານສູນກາງກຳມະບານລາວຫັນເປັນດິຈິຕອນ. ໃນວັນທີ 22 ພຶດສະພາ 2026, ທີ່ສູນກາງສະຫະພັນກຳມະບານລາວ (ສກລ).

ຈຸດປະສົງ ແລະ ຄວາມສຳຄັນຂອງການຮ່ວມມື ໃນຄັ້ງນີ້, ທັງສອງຝ່າຍຈະໄດ້ສຸມໃສ່ການຈັດຕັ້ງປະຕິບັດວຽກງານຕົວຈິງໃນຫຼາຍດ້ານ ຄື: ການຫັນເປັນດິຈິຕອນ: ປັບປຸງວຽກງານຄຸ້ມຄອງ-ບໍລິຫານຫ້ອງການຂອງ ສກລ ໃຫ້ມີຄວາມທັນສະໄໝ ໂດຍສອດຄ່ອງກັບຍຸດທະສາດລາວແຫ່ງຊາດກ່ຽວກັບວຽກງານ ເຕັກໂນໂລຊີ ແລະ ການສື່ສານ, ສ້າງຖານຂໍ້ມູນ: ພັດທະນາລະບົບຖານຂໍ້ມູນຂອງພະນັກງານກຳມະບານລາວ ໃຫ້ເປັນລະບົບດິຈິຕອນ ທີ່ສາມາດນໍາໃຊ້ໄດ້ທຸກທີ່ທຸກເວລາ ແລະ ຮັບປະກັບຄວາມປອດໄພ, ການພັດທະນາພື້ນຖານໂຄງລ່າງ: ນໍາໃຊ້ເຄື່ອງມືທີ່ທັນສະໄໝເຂົ້າໃນການໃຫ້ຄໍາປຶກສາ, ການເກັບກຳຂໍ້ມູນສະເພາະຂອງ ສກລ ໂດຍນໍາໃຊ້ຄັງຂໍ້ມູນແບບ Cloud. ພ້ອມທັງສາມາດນໍາໃຊ້ ເວັບໄຊ ເຂົ້າໃນການເຜີຍແຜ່ນະໂຍບາຍ, ກົດໝາຍ ແລະ ຂໍ້ມູນຂ່າວສານຕ່າງໆຂອງກຳມະບານ ແລະ ພັດທະນາບຸກຄະລາກອນ: ຍົກລະດັບຄວາມຮູ້ດ້ານເຕັກໂນໂລຊີໃຫ້ແກ່ພະນັກງານ ຜ່ານການຝຶກອົບຮົມ ແລະ ສຳມະນາ ວຽກງານບໍລິຫານ-ບໍລິການ ແລະ ພັດທະນາລະບົບດິຈິຕອນ.

:

ບົດບັນທຶກຄວາມເຂົ້າໃຈສະບັບນີ້ ມີຜົນສັກສິດບັງຄັບໃຊ້ເປັນເວລາ 5 ປີ (2026-2030) ແລະ ສາມາດຕໍ່ອາຍຸໄດ້ຕາມການຕົກລົງເຫັນດີຂອງທັງສອງຝ່າຍ. ນີ້ສະແດງໃຫ້ເຫັນເຖິງບາດກ້າວສຳຄັນໃນການຍົກລະດັບບົດບາດຂອງວຽກງານກຳມະບານລາວ ໃນການພັດທະນາວຽກງານດິຈິຕອນ ເຂົາໃນຂົງເຂດວຽກງານວິຊາສະເພາະຂອງຕົນເອງ ເຊິ່ງກໍ່ຄືການພັດທະນາປະເທດຊາດໃຫ້ກ້າວເຂົ້າສູ່ສັງຄົມດິຈິຕອນຢ່າງແທ້ຈິງ.

ໃຫ້ກຽດເຂົ້າຮ່ວມເປັນປະທານ ແລະ ລົງນາມໃນຄັ້ງນີ້ໂດຍ ສະຫາຍ ຄໍາຜອຍ ວັນນະສານ, ປະທານຄະນະບໍລິຫານງານ ສູນກາງສະຫະພັນກຳມະບານລາວ ແລະ ສະຫາຍ ປອ. ສັນຕິສຸກ ສິມມາລາວົງ, ລັດຖະມົນຕີ  ກຕສ ພ້ອມດ້ວຍຮອງລັດຖະມົນຕີ, ຮອງຄະນະບໍລິຫານງານ ສກລ, ຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ, ຄະນະນໍາ, ພ້ອມດ້ວຍພະນັກງານຈາກທັງສອງຝ່າຍເຂົ້າຮ່ວມຢ່າງພ້ອມພຽງ.